1 árs

Það er eitt ár síðan að þessi prins leit dagsins ljós. Það er ekkert í lífinu sem hefur glatt okkur jafn mikið og hann og hann er yndislegur á allan hátt.

Keflavík-Köbenhavn

Nú fer karlinn bráðum að koma heim eftir viku leynilegt ferðalag til Íslands. Hrikalega er leiðinlegt og erfitt að vera frá hvort öðru í svona langan tíma. Já, ákváðum bara að koma fjölskyldunni á óvart. Tilefnið var bíllinn okkar, en það kostar morðfjár að flytja inn bíl hingað til Danmerkur þannig að við ákváðum bara að flytja hann aftur heim og vonumst nú til að hann seljist. Ef einhvern vantar rauðan Volvo, þá er þetta hinn fullkomni fjölskyldu-/flutningabíll. Ég sé nú bara frekar mikið eftir honum.

Já, við komumst ss. að því að væri ódýrast fyrir okkur að senda bílinn heim um síðustu helgi eða þessa, en þar sem erfinginn er að verða eins árs um þessar mundir, þá varð síðasta helgin fyrir valinu. Við pöntuðum því farið á miðvikudegi og svo fór Kiddi á laugardeginum. Hann fór með Smyrilline, en það kom í ljós að það var í raun ódýrara fyrir hann að fara með skipinu og fljúga síðan heim en að senda bara sjálfan bílinn. Svo vildi svo til að Pétur pabbi hans átti 55 ára afmæli í gær, þannig að það var gaman fyrir þá báða að hann skyldi vera þar. Ferðalagið tók 3 sólarhringa, þannig að hann náði nú bara 2,5 sólarhringum í faðmi fjölskyldunnar, en þetta var nú vonandi gaman samt, þó ferðalagið hafi verið minna skemmtilegt. Það er víst ekki upp á marga fiska að sigla með Smyrilline. Ekki mikið í boði þar, og þá sérstaklega leiðinlegt fyrir þá sem ferðast einir. Þá vitið þið það.

Já, Gunnar Jakob verður eins árs þann 1. júní og verður haldið upp á það bæði á laugardeginum og sunnudeginu, hvorki meira né minna. Mæðrahópurinn heldur nefnilega sameiginlega afmælisveislu á sunnudeginum, og ákváðum við því að bjóða öðrum vinum og fjölskyldu á laugardeginum. Nú vona ég bara að blíðan haldist og að vindinum lægi. Það er búið að vera ferlega hvasst undanfarna daga, þó það hafi verið heitt. Nú vonast ég bara til að sýkingin í augunum mínum sé farin, þannig að ég geti loksins fengið þessar blessaðar linsur sem ég hef verið að reyna að fá í nokkrar vikur núna. Þá get ég líka loksins notað þessi líka fínu sólgleraugu sem ég keypti dýrum dómum. Þessi hégómi er alveg að fara með mig! Ég fer bráðum að gefast upp á honum :)

Myndir

Nýjar myndir á barnalandinu gjörið þið svo vel.

Jæja, nú er ekki víst að ég komi heim eftir allt saman (það voru of fáir sem kommenteruðu...!! Nei, nei, smá grín). Miðinn sem var á tilboði er ekki á tilboði lengur vegna of langs umhugsunartíma (maður þarf alltaf að miða við annað fólk og hvernig hitt og þetta passar fyrir það). Svona er nú það. Þetta hefði verið gaman, en við ætlum þá bara að njóta þess að fá fólk í heimsókn og vera í fríi. Þetta hefði svo sem orðið frekar mikið stress. Það gæti líka verið að við keyrum til útlanda með foreldrum okkar, þannig að ég mun mjög sennilega fara til útlanda hvort eð er.

Annars er ég í algjörum sumar fílíng þessa dagana, enda er maður bara á hlírabolnum og stuttbuxum hér alla daga. Það er eitthvað við það að búa í húsi sem er með að hluta til yfirbyggða verönd og garð sem er næstum í fullum blóma og hita um og yfir 20 gráður á hverjum degi sem gerir að manni líður eins og maður sé á leiðinni niðrá strönd. Það er svo langt síðan ég hef búið í landi þar sem það er eðlilegt að það sé heitt úti. Yfirleitt fer maður til túristalanda til að upplifa sólina og þá er yfirleitt strönd nálægt. Að vísu er ströndin ekki langt frá, við eigum bara eftir að fara þangað. Kannski notum við hvíldardaginn til þess og sólum okkur svolítið og tökum með okkur piknikk körfu (sem ég þarf að muna eftir að kaupa by the way. Best að skrifa það niður á listann). Til hvers eiginlega að fara til Íslands þegar maður býr við svona góð kjör, ég bara spyr?! Ok, fólkið er svo sem líka mikilvægt :)

Jæja, nóg af þessu röfli.

Var annars að missa þriðja barnið sem ég var með í gæslu. Það hafði enga leikfélaga á sínum aldri. Svona er nú það. Á meðan er ég alltaf bara með 2 börn, mitt og annað sem ég passa yfirleitt bara hálfan daginn. Frekar mikill lúxus hér á ferð. Fæ samt næsta barn 1.júní, þannig að það verður nú ekki alltaf svona. Guð er bara einstaklega góður við mig og gefur mér sérstaklega langan aðlögunartíma :) Hann veit ég þarf á því að halda.

Heimferð?

Jæja, það er uppi hugmynd um að ég og Gunnar Jakob kíkjum í heimsókn til Íslands í sumar. Þetta myndi bara vera ca. vika (29. vika to be precise). Hvað finnst fólki um það?

Þá er verkfallinu lokið og konan farin að vinna aftur. Ég mun eiga fund á morgun við foreldra barnsins sem ég fæ næst. Það verður spennandi að sjá hvernig það gengur að hafa þriðja barnið. Gunnar Jakob og hinn strákurinn eru orðnir vanir hvorum öðrum og gekk betur í dag en ég átti von á.

Það er allt í blóma hér og sumarið alveg komið. Það voru 23 gráður í gær og eru 21 núna. Því miður fylgir því bíflugur og vespur og finnst mér alveg nóg um. Ég þori varla að fara með börnin út á verönd þar sem þær sækjast alveg í sólstofuna okkar. Við þurfum eitthvað að finna út úr þessu.

Við fórum niðrí bæ í gær þar sem ég var alveg komin með nóg af því að hanga alltaf heima. Stundum nennir maður bara ekki að gera heimilisverkin enn einu sinni! Við keyptum föt á Kidda og Gunnar Jakob, enda var nú alveg kominn tími á það, sérstaklega hvað varðar Kidda. Við höfum lítið þurft að kaupa föt á GJ þar sem hann fékk svo margar gjafir bæði þegar hann fæddist og þegar hann varð blessaður. Þó það hafi allt verið mjög fín föt þá er nú gaman að fá að velja aðeins hvað barnið manns á til að fara í :)
Ég endaði á því að kaupa mér þessi svaka flottu sólgleraugu, enda er ég voðalega viðkvæm fyrir of mikilli birtu. Veit nú ekki af hverju það er. Kannski eru það allir. Ég hef samt eiginlega aldrei átt sólgleraugu, og þau sem ég hef átt hafa bara ekki farið mér, enda ódýrt drasl (afsakið hégómann). Sagan byrjar samt þannig að GJ tóks loksins að eyðileggja gleraugun eftir margar tilraunir. Kiddi límdi þau saman með einhverju lími og þegar við vorum í gleraugnaversluninni ákváðum við að það væri sniðugt fyrir mig að ganga með linsur þar sem ég mun náttúrlega passa fleiri börn í vinnunni. Og þar sem ég hafði ætlað að eignast sólgleraugu með styrk, þá myndi það ekki vera sniðugt þar sem að það er óþarfi með linsur. (Voðalega þarf ég alltaf að útskýra allt í smáatriðum!)

Við fórum líka á kristilegt fjölskyldumót um síðustu helgi. Það var haldið á stað sem er í um 2klst fjarlægð héðan og heitir Himmerlandsgaarden og er í eigu Aðventista. Staðurinn er notaður undir sumarbúðir og alls konar mót, ss. skátamót, fjölskyldumót o.fl. auk þess sem það er leigt út. Bara svipað og sumarbúðirnar á Íslandi. Við gistum samt í sumarbústað sem við leigðum, en það var nýbúið að gera hann upp, þannig að hann var mjög flottur að innan. Þar var sauna og jacoozie í baðherberginu og flottar innréttingar. Þau voru nú ekki búin utandyra, þannig að þar var nú bara sandur og mold. En það gerði nú ekkert til þar sem við reyndum að eyða sem mestum tíma á mótssvæðinu. Það er alltaf aðeins erfiðara með barn. Annars var þetta ágætis mót. Það var gott sem ég náði að hlusta á, en annars var gaman að hitta fólk sem maður þekkti.

Jæja, ætla að fá mér meira te áður en strákarnir vakna.
Bless í bili.